Во периодот од 4-ти до 16-ти мај, Националниот парк Пелистер беше домаќин на експерти од Здружението за истражување и заштита на лилјаци од Германија. Ова значајно истражување, кое ги опфати и НП Галичица и регионот на Преспа, послужи како извонредна основа за едукација на младите кадри.
Практична наука на локалитетот „Бегова чешма“
Во соработка со НП Галичица, организиравме едукативен настан каде беа презентирани биологијата и екологијата на овие фасцинантни ноќни жители. Највозбудливиот дел беше практичната работа на локалитетот Бегова чешма, каде беа поставени четири специјални мрежи за заловување на лилјаци.
Средношколците во улога на научници
Учениците од средните училишта ОСМУ „Д-р Јован Калаузи“ и СОУ „Таки Даскало“ од Битола имаа ретка можност директно да учествуваат во методата „мрежарење“. Ова искуство им овозможи одблизу да ги видат современите методи на истражување и да ја разберат важноста на лилјаците за рамнотежата во природата.
