Во најновото гостување во подкастот „За секого по нешто“ на САКАМДАКАЖАМ.МК, директорот на ЈУНП Пелистер, Иванчо Тошевски, отворено зборува за предизвиците со кои се соочува „белиот дроб“ на Битола. Невремето кое минатата година искрши голем број стебла молика е само „последна опомена“ од природата за децениската негрижа во минатото.
Природна смена на видовите и „битката“ за светлина
Моликата, како светлољубив и пионерски вид, води тивка битка со елата и буката. Во пониските појаси (1.100 – 1.500 м.н.в.), сенкоподносливите видови како елата го освојуваат просторот каде што нема доволно светлина за моликата. Сепак, моликата покажува неверојатна издржливост – таа се искачува на повисоките голини и камењари (1.600 – 1.800 м.н.в.), каде на скијачката патека „Копанки“ веќе се гледаат цели „природни плантажи“ со нов подмладок.
Итни одгледувачки мерки за спас на шумата
Прогнозите од научниот симпозиум во 1969 година денес стануваат реалност – старата моликова шума има потреба од ревитализација. Со помош на стручни инженери и експерти кои помагаат за јавното добро, започнато е расчистување на теренот од околу 1.000 болни и искршени стебла кои претставуваат ризик. Овие активности се водат внимателно и под строг научен надзор, со свесност дека резултатите ќе бидат видливи за 15 до 20 години.
Баланс помеѓу заштитата и туризмот
„Верувајте дека би можеле да правиме сѐ, само едно не смееме, а тоа е да отвориме војна против природата – тоа е војна против самите себе“, истакнува Тошевски. Клучот за иднината на Пелистер е совршениот баланс помеѓу заштитата на екосистемот и развојот на туризмот. Нашата цел не е само профит, туку одржување на главниот „дотурач“ на чист воздух за целиот регион.
Иднина базирана на знаење
Ревитализацијата на Пелистер не е процес кој се решава преку ноќ. Со добро осмислени чекори, стручен увид и вклученост на целата јавност, институцијата останува на патот кон зачувување на автентичниот изглед на првиот национален парк на Балканот.
ПОГЛЕДНЕТЕ ГО ЦЕЛОТО ИНТЕРВЈУ И ПОДКАСТ:
