После интензивираните активности на ренџерската служба и постојаните теренски патроли, дивечот во Националниот парк Пелистер сè почесто се забележува во своите природни живеалишта низ зоната на активно управување и зоната на строга заштита.
Овој успех е директен резултат на континуираната работа за зачувување на природата, како и на активните мониторинг мерки кои се спроведуваат со исклучителна поддршка од Фондот за природа Prespa Ohrid Nature Trust (PONT).
Резултати од мониторингот преку фотозамки
Поставените фотозамки на терен обезбедуваат драгоцени научни податоци за движењето, бројноста, здравствената состојба и меѓусебните интеракции на животните во синџирот на исхрана:
- Волк (Canis lupus): Забележан во својата природна улога на предатор при движење со својот плен (срндач – Capreolus capreolus).
- Дивокоза (Rupicapra rupicapra): По долготраен и интензивен мониторинг, потврдено е нејзиното присуство на високотврдите карпести предели на паркот.
- Дива свиња (Sus scrofa): Регистрирано е движење во поголеми групи, што е карактеристично однесување за овој вид на Баба Планина.
- Дива мачка (Felis silvestris): Често пати помешувана со балканскиот рис од страна на посетителите, дивата мачка има свои специфични карактеристики и во значителна мера се разликува од рисот.
Заедничка мисија за заштита
Заедничките напори на НП Пелистер и PONT даваат видливи резултати во зачувувањето на биодиверзитетот. Нашата мисија продолжува со ист интензитет — да ги сочуваме дивиот свет и природните богатства на Пелистер за идните генерации.
