Директорот на ЈУ Национален парк Пелистер, Иванчо Тошевски, оствари работна средба со амбасадорот на Република Франција во Северна Македонија, Н.Е. Кристоф Ле Риголер, на која главна тема беше ревитализацијата и обновувањето на историскиот Француски пат.
За време на средбата, директорот Тошевски детално го презентираше начинот на функционирање на установата, тековните предизвици во управувањето со заштитеното подрачје, како и стратешките планови за развој на активниот еко-туризам.
Стратешко значење на Францускиот пат
Францускиот пат, кој датира од периодот на Првата светска војна, претставува клучна планинска трансверзала што ги поврзува пелагониската и преспанската страна на Баба Планина. Неговата обнова е од суштинско значење за секојдневното оперативно работење на паркот и е предвидена во сите релевантни стратешки документи на установата:
- Заштита и мониторинг: Како сервисен и земјен пат, оваа траса овозможува подобра заштита на природата, поефикасна контрола на теренот и континуиран мониторинг на дивите видови.
- Противпожарна превенција: Обновата на патот е директно предвидена во Десетгодишната програма за противпожарна заштита (изработена од проф. д-р Никола Николов).
- Туризам и шумарство: Трасата е интегрирана во Стратегијата за развој на туризмот во НП Пелистер (проф. д-р Сашо Коруновски) и во Посебните планови за одгледување на шумите (проф. Горан Сакалиев).
Културно-историска вредност и поддршка за ревитализација
Двете страни се согласија дека покрај оперативната функција, Францускиот пат поседува огромно културно-историско значење кое ќе донесе нова додадена вредност во туристичката понуда на регионот.
Амбасадорот Кристоф Ле Риголер изрази сериозен интерес за активно вклучување и поддршка во процесот на обновување на оваа траса. Целта е преку инфраструктурно уредување и соодветна презентација да се зголеми атрактивноста на локалитетот, овозможувајќи им на посетителите полесен пристап до историските податоци за воените дејствија од Првата светска војна долж овој планински правец.

