Директорката на Агенцијата за финансиска поддршка во земјоделството и руралниот развој (АФПЗРР), Даниела Иротова Лазарева, и директорот на ЈУНП Пелистер, Иванчо Тошевски, официјално го потпишаа договорот за обезбедување и користење на финансиски средства наменети за заштита, управување и одржлив развој на паркот.
Оваа поддршка доаѓа во клучен момент и претставува основа за започнување на крупни инфраструктурни и развојни проекти кои трасираат нов правец во управувањето со Пелистер.
Намена на финансиските средства
Согласно Програмата за заштита на природата, Планот за управување со НП Пелистер и Буџетот на РСМ, средствата ќе се инвестираат исклучиво во:
- Заштита на природата и биодиверзитетот: Сочувување на природните вредности и спроведување на континуиран мониторинг на растителните и животинските видови и нивните живеалишта.
- Превенција од пожари и инфраструктура: Зајакнување на капацитетите за превенција и заштита од шумски пожари, одржување и унапредување на зелената инфраструктура.
- Посетителска инфраструктура и еко-туризам: Уредување и одржување на планинските патеки, пристапните објекти, како и развој на еколошкиот туризам.
- Капацитети и едукација: Набавка на неопходна опрема за теренска работа, санација и реконструкција на објекти, еколошка едукација и подигнување на јавната свест.
Оваа директна поддршка го потврдува институционалниот партнерски однос во зачувувањето на природното и руралното богатство на Баба Планина.
