ЈУ Национален парк Пелистер, во соработка со Rotary Club Bitola Shirok Sokak, започна со теренски активности за обнова на познатиот Видиковец (2.000 мнв) лоциран на патеката по Камењарот. Во претстојниот период, согласно временските услови, ќе бидат поставени нови посетителски содржини и на локациите Јоргов Камен (1.744 мнв) и Црвени Стени (1.788 мнв).
Унапредување на најпосетуваните локалитети
Јоргов Камен, Црвени Стени и Камењарот спаѓаат меѓу најпосетуваните и нај привлечните точки во паркот, поврзани со мрежа на планински патеки во вкупна должина од преку 30 километри.
- Инфраструктурни подобрувања: Новите елементи и содржини имаат за цел да ја зголемат атрактивноста на овие локалитети и подобрување на условите за престој на планинарите.
- Зачувување на пејзажот: Сите нови содржини се дизајнирани и внимателно лоцирани за целосно да се вклопат во природната средина, без да се наруши пејзажната вредност на просторот.
Партнерство со општествено одговорни организации
Оваа соработка помеѓу ЈУНП Пелистер и Rotary Club Bitola Shirok Sokak испраќа силна порака до јавноста дека заштитата на природата, нејзината афирмација и развојот на одржливиот туризам се заедничка одговорност која се реализира со конкретни дела.
Пелистер продолжува да биде симбол на обединување и заеднички грижи за природното наследство на Битола и Македонија.
